雖然話係概念車，但預計將會在2025年推出嘅量產 G -Class EV，將會叫做EQG，而且係自從1979年以來最顛覆性嘅換心大行動！至於外形就同現有新一代以引擎為心臟嘅G-Class無大變動，不過已經係經過大量嘅造型修改，令到EQG嘅外觀同全新 EQ 電動車系列保持一致。

好彩經過EQ化嘅外形，仲保留住G-Wagen嘅經典線條，不過掛在車尾嘅已經唔係猛男式嘅士啤呔，而係裝載充電線嘅儲物箱，而車頂就有個好Man嘅機甲化大 G字樣，為電動化嘅EQG營造番剛強嘅味道。

平治對 EQG 嘅大部分技術細節仍然保密，只透露依然保持 G-wagen 嘅梯形車架，電池組就放置車架中以降低重心，底盤已經過特別修改以容納電池及電動摩打，仍然係獨立前懸掛及堅固嘅後軸。 至於四驅功能就透過四個電動摩打分別安裝在四個車輪，可以單獨控制個別車輪，再配合埋兩速波箱，就可以提供低及高檔齒比，以對應越野性能及公路駕駛性能。

雖然G-Class已因應歷史洪流而向未來進撃，但無可否認，呢一代 G-wagen 保留咗 G 嘅魅力同埋駕駛特性，同時又變得更舒服，所以銷量都相當好，不過香港就只引入AMG G63，雖然昂貴，但非常Man，不如睇番2018年推出2019年抵港嘅新一代G-Class啦：邊個夠佢 MAN│MERCEDES-AMG G 63