環保洪流沒法擋，就算富豪級SUV Bentayga都冇例外，都要推出插電混能版。

曾幾何時，全世界政府對環保車嘅定義仲未有共識，而十年前各大車廠仲考慮緊到底係選擇電動車定係氫燃料電池車作為環保車方案好啲，忽然間被全新車廠Tesla憑藉高續航力電動車跑出，而且在短短幾年間，令消費者對電動車大為接受，於是各大車廠都暫時放低氫燃料電池車 ，全力向電氣化進軍。

以賓利為例，亦已經定下Beyond 100發展藍圖，在2023年之前，賓利三個系列都會推出Hybrid車型，去到2025年將會推出首架全電動車型，2026年則全系列都會由全電及插電混能車型組成，至於剛抵港嘅Bentayga Hybrid，已經係改進成插電嘅第二代混能型號。

Bentayga Hybrid配3公升雙渦輪增壓V6引擎，最大馬力340ps，峰值扭力450Nm，配合電動摩打及17.3kWh鋰離子電池後，性能上升為449ps及700Nm，0-100km/h加速只需5.5秒，而純電動行車可以行走約50公里，可謂專為市區或進入住宅區時應用，而純電行車最高車速可去到135km/h。

駕駛模式分為 EV ，Hybrid 及Hold 工種模式，當車輛啟動時為EV 模式， Hybrid 模式會根據駕駛風格及踩油力度，作出最有效率嘅動力輸出； 至於 Hold 模式，就會為電池中保持盡可能最高電量，以便在市區採用EV 模式時有足夠嘅電量純電行車。

Bentayga Hybrid 分別有四座及五座嘅選擇，標準已配無線Apple CarPlay，仲有首次在賓利車型應用嘅Android Auto車載系統，新車售價由港幣$3,665,000起。