對已經係Avantador嘅車主嚟講，一架出咗10年準備退役嘅特別版，到底仲有乜特別意義？

當全世界都一窩蜂追求電動車，連跑車廠都被迫要發展電動跑車，仲係堅持V12自然吸氣引擎嘅林寶堅尼Avantador，將會係極少數最後嘅燃油引擎跑車，呢點就成為 Aventador LP 780−4 Ultimae 終極版嘅最大意義。

一架服役咗10年嘅廠方旗艦跑車，作為退役嘅終極特別版，無論對車廠定係車主，點都要符合劃上完美句號嘅定義，最好係可以成為經典珍藏，咁至可以顯示出車廠嘅誠意。所以性能上，Aventador LP 780−4 Ultimae嘅780匹最大馬力，比SVJ提升咗10匹，比 Aventador S多40匹；至於車重就 1,550 公斤，硬頂版比 Aventador S輕25 公斤，比 SVJ 重25 公斤 ，由於馬力多10匹，於是又同SVJ 一樣係1.98 公斤/匹嘅重量馬力比，兩者嘅0-100 公里/小時加速都係只需 2.8 秒。 

按照林寶傳統，在全新入替 Aventador 車型面世之前，外形係一定唔會大變嘅。 Ultimae 可謂只係冇咗大尾翼嘅SVJ低調版，但車側裙腳嘅擾流及搶眼嘅雙出大尾喉，明顯係源自SVJ 嘅設計；至於前泵把擾流，引擎艙蓋及主動式尾翼，就令人想起 Aventador S。老套啲咁講，變無可變，唯有盡量在擾流與外觀要極盡有型之間作出最大嘅增值啦。

車廂配備TFT 數碼儀錶板， 亦具備Apple CarPlay功能； 駕駛模式有一貫嘅Strada (道路)、Sport(運動)及Corsa(賽道)三種駕駛模式，另外又有EGO自訂模式可選，以供駕駛人根據個人偏好對車輛進行個性化設置，當中包括: LMS(林寶堅尼磁流變懸掛)、牽引力控制(引擎、波箱和四輪驅動)以及轉向功能。

廠方宣佈會為Aventador LP 780-4 Ulitmae限量生產350部硬頂版及250部開篷版，香港售價硬頂版為港幣 $ 8,180,000起，開篷版售價港幣$8,880,000起。作為現有車主及想成為林寶車主又值唔值得擁有？如果Aventador LP 780-4 Ultimae 代表車型嘅終結，同時又係林寶最後一款V12自然吸氣引擎道路跑車告別作嘅話，肯定都幾難抗拒！