無電櫈，無電門，無電子手掣，所有嘢都係全手動，設備咁齋，到底咩玩法？

Multivan、Sharan、Touran、Caddy，數數下，VW已經成為本地擁有最多MPV型號的歐洲品牌。跟Multivan Kombi一樣，雖然Caddy Kombi係由商用車改裝而成，不過勝在造形特別兼且運載空間巨大，車主可以喺裝飾方面盡情發揮創意。

接受到手動趟門就無問題
無電趟門，喺香港的MPV巿場幾乎是死罪。明嘅，度門咁大，重吖嘛，上落唔方便喎；所以，如果真係咁需要一對電趟門，今次長測呢部Caddy Kombi就未必啱你了。假如接受到手動趟門，我有理由相信你都唔會介意無天窗、無電櫈，又或者你本身就鍾意手拉handbrake發出「格格」聲嗰種有回應的存在感，是咁的話，你同Caddy之間的距離會拉近咗一半。

越級無敵超巨型載運空間
Caddy Kombi係一部幾誠實的車，車廂無嗰種夾硬迫出來的豪裝，所以唔會出現仿真木呢類會令部份人起雞皮的飾件。長陣版加埋超高的頭頂空間，最大得益係一個超越同級的行李艙容積；中排及後排座椅唔可以前後移動，座艙應用上唔夠彈性，但兩排座枱都可以獨立收摺甚至成張拆走，增大的行李艙空間大到用嚟搬屋都得。後座的乘坐質素及腳部空間跟中排差唔多，但要進出後座就要先拉起把手把中座椅背向前摺，再拉起另一個把手把整張中座向前座椅背方向摺起，所以後排最好留番畀好似狄Sir咁身手敏捷的年青人。

設備齋得嚟都算好齊
中排地毯底有個儲物暗格，前座椅底部亦有個櫃桶仔；女士如果坐上領航席，可以把手袋放上頭頂的儲物格，唔使攬住或者放喺地台；呢個頭頂儲物格配合埋較高的車廂空間及車長，就算成塊滑浪板放晒入車廂都無問題，我仲未諗唔到有邊部MPV可以做得到，知道嘅唔該通知聲。坐椅承托力足夠，駕駛視野廣闊；手枕箱可以伸縮及調校高度，我覺得調高兩格會啱啱好，再高一格，拉手掣就會有少少頂住。話佢設備齋，其實又唔齋得晒，起碼有個多功能軚盤、有引擎start/stop功能、有泊車後視鏡頭、Bi-xenon頭燈、電動側鏡、8氣袋、二次防撞預煞系統、電子行車穩定系統連剎車輔助ESC、循迹防滑系統ASR、電子防滑差速器EDL及疲勞駕駛警示系統Rest Assist等。

引擎夠力又堅慳油
跟Touran採用同一副1.4公升turbo引擎，不過馬力就被調低咗24ps，再加埋車身較重，所以在整體性能方面係會輸畀Touran。由於係貨車底，所以隔音方面會弱少少，但濾震緩衝能力就可以做到有8成Touran的舒適，操控方面亦似房車。輸出125ps，坐滿人加埋幾件行李之後，由於低轉已經可以爆出引擎最大扭力，所以表現唔算吃力，一般正常揸，超車、上斜一定夠用無問題。長測5天，大部分時間載住三大兩細兩部單車少量行李，錄得平均耗油5.9L/100km，非常接近廠方的公布數字，呢副千四渦輪增壓偈亦係我暫時試過最慳油表現又最合理的一副。值得注意番，由於車身高，加上行李艙門亦無感應裝置，所以喺高度較矮的停車場打開行李艙門時，就要記住慢慢揭起，否則隨時撞花艙門。

Volkswagen Caddy Kombi 7-seater 規格表
引擎：L4 TSI Turbo
容積：1,395c.c.
馬力：125ps@5,000-6,000rpm
扭力：220Nm@1,500-3,500rpm
傳動：前置引擎/前輪驅動
波箱：7前速DSG雙離合
0-100km/h：11.3秒
極速：183km/h
懸掛：(前)麥花臣/ (後)複合式
制動：(前)通風碟/ (後)實心碟
輪圈：16吋合金
輪胎：(前/後)205/55 R16 Continental ContiEcoContact 5
長x闊x高：4,878 x 1,793 x 1,868mm
軸距：3,006mm
車重：1,695kg
油耗：5.8-5.7L/ 100km (Combined)
售價：$259,000 (Special promotional price)