由MQB、DCC、VAQ、XDS+及EA888構成的黃金組合，即使輸出增大之後亦未能問鼎地上最強的頭轆車，但攻彎的貼服感與平衡度，佢一定贏晒。

好多人都咁樣問過：到底Civic Type R同Golf GTI邊部快啲？
講加速力，頭轆車嚟講，唯一可以同Type R匹敵就只有Clubsport，不過facelift後的Performance，馬力及扭力都同時遞增，0-100km/h加速只落後Type R半秒，而且今次換咗一副7前速DSG波箱，再加埋超級熨貼的底盤調校及豐沛的低轉扭力，跑山，要甩開Performance唔係咁易。

最抵玩的GTI
Facelift後的Golf GTI Performance，優勝之處係極限非常高，容易發揮汽車的性能，而且車價比Civic Type R便宜一大截，唯一比較輸蝕係前座椅的包裹力唔及Type R。相比之下，標準配備賽車桶櫈及overboost的Clubsport，無論車價或裝備方面都更加吸引，不過去年40輛限量配額好快就被搶購一空。

實測耗油表現
不過咁，今次長測呢部全新7代半的Golf GTI Performance都唔弱，0-100km/h的加速甚至比Clubsport還要快0.1秒，每百公里耗油平均少咗0.7L。實際情況，在ECO模式之下，於巿區及公路混合路段錄得9.1L/100km的平均耗油；至於用Sport mode跑山，耗油量就上調到13.4L/100km，呢個數字對一輛高性能hatchback嚟講可以算慳油。

雙噴射技術
呢副用嚟取代EA113的EA888渦輪增壓機器可以又爆又慳油，原因係經過咗兩代的進化而成。
首代EA888已有缸內直噴及可變氣門正時技術，第二代仲加咗AVS可變氣門升程及提高燃油供應壓力。嚟到今代，EA888直頭係脫胎換骨，改動項目主要分為五項，當中包括採用咗雙噴射系統，即係缸內直噴及歧管噴射（FSI+MPI）；FSI位於汽缸蓋上的高壓噴射力達200bar，而位於進氣歧管的MPI則以3bar作出低壓噴射，採用兩種燃油噴射方式可同時增強動力及減低油耗，仲可以減少過往的積碳問題。

歷代最慳油
除咗FSI+MPI，還加裝了可以keep住最佳工作温度的排氣歧管熱管理系統及換上加粗咗嘅抗磨高拉力正時鏈條，最重要係改善咗油氣分離裝置，解決咗前兩代的燒偈油問題。渦輪增壓器由日本IHI提供，外殼由鑄鐵改用不鏽鋼之後，可以承受更高的負荷及增強耐用性。冷卻循環系統亦由熱敏傳感改為電機主動控制冷卻液循環流向，幾樣嘢加加埋埋，使新一代EA888的耗油量由首代的8.0L/100km降至現在的6.0L/100km。

只配雙離合波箱
變臉前，6MT，230ps，350Nm；變臉後，245ps，370Nm，輸出大咗，但換咗7前速DSG波箱，冇得玩手波。頭轆多咗15ps，瞬間提速比以前更快更爽；兩段式可變氣門正時系統的分水嶺約在引擎的3,000轉範圍，所以無論行緊邊個mode，一旦踩上三千轉就會感受到一股無法按捺的拉力。

操控貼貼服服
跟第6代GTI比較，今代GTI的轉向反應明顯敏銳咗靈活咗，懸掛硬度亦放緩咗舒服咗，主要原因係換咗新一代的XDS+。呢套在過彎時能主動對內圈輪胎施加制動的XDS系統，雖然第6代已經用緊，但只限於前輪；至於今代GTI所採用的新一代XDS+，就把制動力延伸到內圈後輪，因為進一步提升了轉向準繩度，所以懸掛可以比上一代調得軟一點，凹凸路面冇咗以前嗰種彈跳感，再加埋Porshce有份參與底盤調校，熨貼感可以話係頭轆車之最。

更接近四輪驅動
為咗追求更完美的彎道演繹，發展到呢款7代半，ESC 系統的介入時間被提早了，所以出彎的表現會非常接近四輪驅動，不過只要啟動ESC Sport，就可以有番 facelift 前嗰種頭轆驅動的前後拉鋸感。前後制動加大至340mm及310mm，除咗高速更加好收之外，彎前減速都更順更細緻，整體操控表現比 facelift 之前更精煉更隱定。

2018 Volkswagen Golf GTI Performance 規格表
引擎：L4 TSI 16V Turbo
容積：1,984c.c.
馬力：245ps@5,000-6,200rpm
扭力：370Nm@1,600-4,300rpm
傳動：前置引擎/前輪驅動
波箱：7前速DSG半自動配軚盤+/-轉檔
0-100km/h：6.2秒
極速：250km/h
懸掛：(前)麥花臣支柱/ (後)四連桿
制動：(前/後)通風碟
輪圈：19吋合金
輪胎：225/35 R19 88Y Pirelli P Zero
長x闊x高：4,268 x 1,790 x 1,482mm
軸距：2,620mm
車重：1,418kg
油耗：6.3L/ 100km (combined)
廢排：144g/km
售價：$419,980 up