當所有車都要退後迴避時，我可以毫無顧慮踩油直過，這種感覺，超爽。

雖然SUV具備攀山涉水的本領，但老實講，始終係房車底，真係去嬉山的，會正正經經買部越野車，有幾多個會揸住部SUV又越過高山又越過谷吖！

唔捨得
其實啱的，玩越野，幾時都係陣式車架的天下，而且上得山，就預咗會整花部車，好似Defender、Wrangler或G-Class呢類，車身有幾條疤，會好Man；但换轉是Touareg呢類豪華SUV，會畀人覺得你手車屎，揸唔掂咁大部車，就好似一個眉清目秀着住套老西的小鮮肉，臉上多了一條疤，好大件事呀！

護身符
咁講法，一輛周身刀張張利的城巿SUV，到底意義何在？講真，其實SUV早就變成車廠之間互相較量越野裝備的場所，好多車主揸咗幾年，最多都只係去探外母時，駛到村口前調高一兩格離地距，已經好叻叻豬了，有啲車都换埋，但重來未用過off-road模式，更莫說中央差速鎖這類咁專嘅野外功能。
當然，可以當是「有備無患」的，即是果啲能避過「專業目測」的空心樹，突然間塌下來擋住成條路，又或者路面無端端有個窿，果時就可以大派用場，對於愈來愈多不可思議事情發生的香港，可以當係一道護身符。

真越野
今次長測的Touareg，除了具備時下極之普及的自選駕駛套餐之外，還有可選對應路況的on-road及off-road行駛模式。on-road是一般日常路面，一旦轉入off-road，HDC下坡緩速系統及EDL電子限滑差速等越野輔助裝置就會進入stand-by狀態；而所謂的off-road，並唔是原本平坦的路面多了幾顆砰石又或者凹凸不平野草横生的爛地停車場，呢啲普通一部房車仔都可以應付得來；如果你從來沒接觸過越野，當見到連你都完全唔敢相信可以行到車嘅路，又或者根本唔係路，果時你隻左手就可以移去旋鈕選用off-road，唔使驚，慢慢嚟；儀表板中央會顯示前輪的轉向角度，試多幾次，話唔定你會上癮，weekend約埋三五同好去荒郊野嶺攀山涉水，不過呢啲功能必須解釋清楚畀你位「妻到無求膽自大」嘅老婆大人知，如果唔是，佢分分鐘由三樓停車場撞開圍欄直接衝落地面都似。

無難度
長測四天，天氣反常，遇過多次暴雨驕陽，一海之隔，可以一面天堂一面地獄。最深刻一次，入紅隧前還是天朗氣清，一出隧道就傾盤大雨；在理工大學對出的康泰徑停燈位等緊右轉入康榮徑時，見到一輛的士、GLC及Vellfire入後波退出康榮徑，再左轉駛入康莊道，乜料呀？
駛近一睇，哦！原來鑊形路面有個大水氹。有幾深？唔清楚喎，不過連咁有經驗嘅的士佬都掉頭走，我估好大機會浸過死氣喉。呢部Touareg有電子升降氣壓懸掛，有需要時可把離地距額外調高300mm，涉水深度高達580mm，區區「路面積水」，根本無需理會，照去。

強底盤
用3.6公升V6心臟去推郁逾兩噸的Touareg，低轉區域都算充實又滑溜，想要澎湃啲，指針就要踩到近3,000rpm。避震setting有點偏軟，如果上斜彎心畀大油出彎，會出現輕微搶軚，建議comfort用於車速低過50km/h的巿區，高速公路用normal，山路就轉用sport。關掉引擎start/shop 功能，綜合四天巿區耗油數值，得出12.2L/100km，話晒都係V6自然吸氣，算合理。

抵到震
車廂闊落，行李艙備有懸掛升降控制功能鍵，方便上落行李，後座又可獨立調節風力位置温度，呢類咁窩心的設備，好多賣得貴過佢嘅SUV都無，如果有埋Sharan 張兒童變形椅，咁就真係不得了。舒適、紮實、四驅、有霸氣、能攀山涉水、唔怕極度惡劣天氣，以一輛德國SUV來講，80萬有找算是招積出色超級超值。

2015 Volkswagen Touareg V6 BMT 4Motion R-Line 規格表
引擎：V6 FSI 24V
容積：3,597c.c.
馬力：280ps@6,200rpm
扭力：360Nm@3,000-4,000rpm
傳動：前置引擎/四輪驅動
波箱：8前速自動
0-100km/h：7.8秒
極速：220km/h
懸掛：(前/後) 雙搖臂
制動：(前/後) 通風碟
輪圈：20吋合金
輪胎：275/45 R20
長x闊x高：4,899 x 1,940 x 1,709mm
軸距：2,893mm
車重：2,103kg
油耗：9.9L/ 100km
廢排：236g/km
售價：$779,980